ମୋ ଜୀବନର ଅଭୁଲା କଥା

୧. ଉତ୍ତର କୁହ :

କ) ଲେଖକ ଚତୁର୍ଥ ଶ୍ରେଣୀରେ ପଢୁଥିବାବେଳେ ଦେଶର ଅବସ୍ଥା କିପରି ଥିଲା ?

ଉତ୍ତର : ଲେଖକ ଚତୁର୍ଥ ଶ୍ରେଣୀରେ ପଢୁଥିବାବେଳେ ଦେଶ ପରାଧୀନ ଥିଲା | ସ୍ଵାଧୀନତା ଆନ୍ଦୋଳନ ପାଇଁ ମହାତ୍ମାଗାନ୍ଧୀ ଡାକରା ଦେଇଥିଲେ |

ଖ) ୧୯୨୧ ମସିହାରେ ଭାରତରେ ହୋଇଥିବାଆନ୍ଦୋଳନର ନାମ କ’ଣ ?

ଉତ୍ତର : ୧୯୨୧ ମସିହାରେ ଭାରତରେ ହୋଇଥିବା ଆନ୍ଦୋଳନର ନାମ ସ୍ଵାଧୀନତା ଆନ୍ଦୋଳନ |

ଗ) ମହାତ୍ମାଗାନ୍ଧି ପାରଳାଖେମୁଣ୍ଡିକୁ ଆସି କ’ଣ କଲେ ?

ଉତ୍ତର : ମହାତ୍ମାଗାନ୍ଧି ପାରଳାଖେମୁଣ୍ଡିକୁ ଆସି ସ୍ଵାଧୀନତା ଆନ୍ଦୋଳନ ବିଷୟରେ ପ୍ରଚାର ସଭାକଲେ |

ଘ) ଛାତ୍ରମାନେ ଗାନ୍ଧିଜୀଙ୍କୁ କିପରି ସୁରକ୍ଷା ଦେଇଥିଲେ ?

ଉତ୍ତର : ଛାତ୍ରମାନେ ଚକ୍ରାକାରରେ ଘେରକରି ହାତକୁ ହାତ ଛନ୍ଦି ମଝିରେ ମହାତ୍ମାଗାନ୍ଧିଙ୍କୁ ରଖି ସୁରକ୍ଷା ଦେଇଥିଲେ ।

ଙ) ଗାନ୍ଧିଜୀ ଲେଖକଙ୍କୁ କ’ଣ କହିଥିଲେ ?

ଉତ୍ତର : ଗାନ୍ଧିଜୀ ଲେଖକଙ୍କୁ କହିଥିଲେ ‘ଆରେ ପିଲା ! ତୁ ନିଜକୁ ନିଜେ ତ ସମ୍ଭାଳିପାରୁ ନାହୁଁ, ମୋତେ ସମ୍ଭାଳିବୁ କିପରି ?”

୨. ଉତ୍ତର ଲେଖ :

କ) ଲେଖକ କାହାକୁ ନିଜର ପିତାମହୀ ଓ କାହାକୁ ଜନନୀ ବୋଲି କହିଛନ୍ତି ?

ଉତ୍ତର : ଲେଖକ ଭାରତ ମାତାକୁ ପିତାମହୀ ଓ ଉତ୍କଳକୁ ଜନନୀ ବୋଲି କହିଛନ୍ତି |

ଖ) ଗରିବ ବାଳକଟିର ବେଶଭୂଷା କିପରି ଥିଲା ?

ଉତ୍ତର : ଗରିବ ବାଳକଟିର ବେଶଭୂଷା ନିହାତି ଦୟନୀୟ ଥିଲା | ସେ ଖଣ୍ଡିଏ ଛିଣ୍ଡାଲୁଗା ପିନ୍ଧିଥିଲା , ମଳିଆ ବୁକୁଚାଟିଏ ଧରିଥିଲା, ତା’ର ମୁହଁ ଅନାହାରକ୍ଳିଷ୍ଟ ଶୁଷ୍କ ଥିଲା |

ଗ) ଲେଖକ ପିଲାଟିକୁ କିପରି ସାହାଯ୍ୟ କଲେ ?

ଉତ୍ତର : ଲେଖକ ପିଲାଟିର ପାଠପଢିବାର ଆଗ୍ରହ ଦେଖି ତାଙ୍କର ସାଙ୍ଗ ସାଥୀମାନଙ୍କୁ କହି ତାକୁ ବହିପତ୍ର ଯୋଗାଇ ଦେଲେ ରାଧାକାନ୍ତ ମଠର ମହନ୍ତକୁ କହି ତା’ର ଖିଆପିଆର ବନ୍ଦୋବସ୍ତ କଲେ ଏବଂ ଅବନୈତିକ ଶିକ୍ଷାଲାଭ ପାଇଁ ସ୍କୁଲରେ ନାମ ଲେଖାଇଦେଲେ ?

ଘ) ଉକ୍ତ ପିଲାଟି ସହ ଲେଖକଙ୍କର ପୁଣି କେଉଁ ପରିସ୍ଥିତି ସାକ୍ଷାତ ହେଲା ?

ଉତ୍ତର : ଲେଖକ ୧୯୪୩ ମସିହାରେ ପୁରୀରୁ ପାରଳାଖେମୁଣ୍ଡି ଫେରୁଥିଲା | ଖୋର୍ଦ୍ଧା ଷ୍ଟେସନ୍ ରେ ମାନ୍ଦ୍ରାଜ ମେଲ୍ କୁ ଅପେକ୍ଷା କରିଥିଲେ | ଏହି ସମୟରେ ମାନ୍ଦ୍ରାଜ ଆଡୁ ସ୍ପେଶାଲ ମିଲିଟାରୀ ଗାଡି ଆସି ଖୋର୍ଦ୍ଧାରଏ ପହଞ୍ଚିଲା, ସେହି ଗାଡିରେ ଲେଫ୍ଟନାଣ୍ଟ ଅଫିସର ପଦବୀ ପାଇଥିବା ଉକ୍ତ ପିଲାଟି ଆସିଥିଲା ଏବଂ ଲେଖକଙ୍କ ସହିତ ତାହାର ସାକ୍ଷାତ ହେଲା |

ଙ) ମିଲିଟାରୀ ପୋଷାକ ପିନ୍ଧିଥିବା ସେଇ ଯୁବକଙ୍କର ନାଆଁ କ’ଣ ?

ଉତ୍ତର : ମିଲିଟାରୀ ପୋଷାକ ପିନ୍ଧିଥିବା ସେଇ ଯୁବକଙ୍କର ନାଆଁ ବ୍ରହ୍ମଚାରୀ ମୁଇଁ |

୩ . କେଉଁ ପ୍ରସଙ୍ଗରେ କୁହାଯାଇଛି ?

କ) “ତୁ ନିଜକୁ ନିଜେ ତ ସମ୍ଭାଳି ପାରୁନାହୁଁ , ମୋତେ ସମ୍ଭାଳିବୁ କିପରି ?”

ଉତ୍ତର : “ତୁ --------------କିପରି ?”

ଉକ୍ତ ଗଦ୍ୟାଂଶଟି ‘ଆମ ସାହିତ୍ୟ’ ପୁସ୍ତକର ‘ମୋ ଜୀବନର ଅଭୁଲା କଥା’ ପ୍ରବନ୍ଧରୁ ଆନୀତ | ଏହି ପ୍ରସଙ୍ଗରେ ଲେଖକ ସତ୍ୟନାରାୟଣ ରାଜଗୁରୁ ଗାନ୍ଧୀଜୀଙ୍କ କହିଥିବା କଥା ବିଷୟରେ ବର୍ଣ୍ଣନା କରିଛନ୍ତି |

୧୯୨୧ ମସିହାରେ ସ୍ଵାଧୀନତା ଆନ୍ଦୋଳନ ଡାକରା ଦେଇ ପ୍ରଚାର ଉଦ୍ଦେଶ୍ୟରେ ମହାତ୍ମାଗାନ୍ଧୀ ପାରଳାଖେମୁଣ୍ଡି ଆସିଥିଲେ | ସେତେବେଳେ ବ୍ରିଟିଶ ସରକାରଙ୍କ କଟକଣା ହେତୁ ସଭାକରିବାକୁ ସ୍ଥାନ ମିଳିଲାନାହିଁ | ଛାତ୍ରମାନେ ଜୋରକରି ସଭା ଆୟୋଜନ କଲେ | ଲୋକ ଗହଳି ହେଲା | କେତେକ ଛାତ୍ରଙ୍କ ସହିତ ଲେଖକ ଚକ୍ରାକାରରେ ଘେର କରି ହାତକୁ ହାତଛନ୍ଦି ଗାନ୍ଧୀଜୀଙ୍କୁ ଲୋକଗହଳି ଭିତରେ ମଞ୍ଚକୁ ନେବାକୁ ଚେଷ୍ଟା କରୁଥିଲେ | ଜନତାର ଚାପରେ ଲେଖକ ମହାତ୍ମାଙ୍କ ଆଡକୁ ଠେଲି ହୋଇଗଲେ | ଏହି ଅବସରରେ ମହାତ୍ମାଗାନ୍ଧୀ ଲେଖକଙ୍କୁ ସ୍ମିତହାସ୍ୟ କରି ହିନ୍ଦୀରେ କହିଲେ ‘ଆରେ ପିଲା : ତୁ ନିଜକୁ ତ ନିଜେ ସମ୍ଭାଳି ପାରୁନାହୁଁ ମୋତେ ସମ୍ଭାଳିବୁ କିପରି ?”

ପ୍ରସଙ୍ଗଟି ପ୍ରଶଂସନୀୟ |

ଖ) “ମନୁଷ୍ୟର ଜ୍ଞାନ ଓ କର୍ମ ଏକାସ୍ତରରେ ରହିବା ଆବଶ୍ୟକ | ତୁମର ଜ୍ଞାନ ପରିପକ୍ୱ ହେଲେ ଦେଶ ପାଇଁ କର୍ମ କରିବାକୁ ଶକ୍ତି ପାଇବ |”

ଉତ୍ତର : “ମନୁଷ୍ୟର --------------------ଶକ୍ତିପାଇବ |”

ଉକ୍ତ ଗଦ୍ୟାଂଶଟି ‘ଆମ ସାହିତ୍ୟ’ ପୁସ୍ତକର ‘ମୋ ଜୀବନର ଅଭୁଲା କଥା’ ପ୍ରବନ୍ଧରୁ ଆନୀତ | ଏହି ପ୍ରସଙ୍ଗରେ ଲେଖକ ସତ୍ୟନାରାୟଣ ରାଜଗୁରୁ ତାଙ୍କର ପିତା ତାଙ୍କୁ ଯେଉଁ ଉପଦେଶ ଦେଇଥିଲେ ତାହା ବର୍ଣ୍ଣନା କରିଛନ୍ତି |

ଲେଖକ ମହାତ୍ମାଗାନ୍ଧୀଙ୍କ ଭାଷଣ ଶୁଣି ଜାତୀୟତାରେ ଉଦ୍ବୁଦ୍ଧ ହୋଇଗଲେ | ସଭାରୁ ଫେରିଆସି ସ୍କୁଲରୁ ନାମ କାଟି ରାଜନୀତିରେ ମାତିଲେ | ତାଙ୍କର ଏବଳୀ କାର୍ଯ୍ୟକଳାପକୁ ତାଙ୍କର ପିତା ସହ୍ୟ କରି ପାରିଲେ ନାହିଁ | ଏଭଳି କାର୍ଯ୍ୟରୁ ଲେଖକଙ୍କୁ ନିବୃତ୍ତ କରାଇବା ନିମିତ୍ତ ତାଙ୍କ ପିତା କହିଥିଲେ ଯେ ମନୁଷ୍ୟର ଜ୍ଞାନ ଓ କର୍ମ ଏକାସ୍ତରରେ ରହିବା ଆବଶ୍ୟକ | ଜ୍ଞାନ ପରିପକ୍ଵ ହେଲେ ଦେଶ ପାଇଁ କର୍ମ କରିବାକୁ ଶକ୍ତି ମିଳିବ | ସେ ପର୍ଯ୍ୟନ୍ତ ଲେଖକଙ୍କୁ ଅପେକ୍ଷା କରିବା ଆବଶ୍ୟକ |

ପ୍ରସଙ୍ଗଟି ଶିକ୍ଷଣୀୟ |

ଗ) “ସୁବିଧା ଓ ପାରିପାର୍ଶ୍ଵିକ ଅବସ୍ଥା ହିଁ ମନୁଷ୍ୟକୁ ଉଚ୍ଚ କିମ୍ବା ନୀଚ କରିଥାଏ |”

ଉତ୍ତର : “ସୁବିଧା ---------------------କରିଥାଏ |”

ଉକ୍ତ ଗଦ୍ୟାଂଶଟି ‘ଆମ ସାହିତ୍ୟ’ ପୁସ୍ତକର ‘ମୋ ଜୀବନର ଅଭୁଲାକଥା’ ପ୍ରବନ୍ଧରୁ ଗୃହୀତ | ଏହି ପ୍ରସଙ୍ଗରେ ଲେଖକ ସତ୍ୟନାରାୟଣ ରାଜଗୁରୁ ସୁବିଧା ଓ ପାରିପାର୍ଶ୍ଵିକ ଅବସ୍ଥାର ଗୁରୁତ୍ଵ ବର୍ଣ୍ଣନା କରିଛନ୍ତି |

ଲେଖକ ବ୍ରହ୍ମଚାରୀ ମୁଇଁ ନାମକ ଏକ ଗରିବ ପିଲାକୁ ସାହାଯ୍ୟ କରିଥିଲେ | ତାଙ୍କରି ସାହାଯ୍ୟ ବଳରେ ସେ ପାଠପଢି ଲେଫ୍ଟନାଣ୍ଟ ପଦବୀ ଲାଭକରିବାକୁ ସକ୍ଷମ ହେଲା | ୧୯୪୩ ମସିହାରେ ଖୋର୍ଦ୍ଧା ଷ୍ଟେସନରେ ଅକସ୍ମାତ ତା ସହିତ ସାକ୍ଷାତ ହୋଇ ଲେଖକ ପୂର୍ବ ପରିସ୍ଥିତି ମନେ ପକାଇ ଆଶ୍ଚର୍ଯ୍ୟ ହୋଇଥିଲେ | ତେଣୁ ସୁବିଧା ଓ ପାରିପାର୍ଶ୍ଵିକ ଅବସ୍ଥା ହିଁ ମନୁଷ୍ୟକୁ ଉଚ୍ଚ କିମ୍ବା ନୀଚ କରିଥାଏ ; ଏଭଳି ଏକ ବିଚାରଧାରାକୁ ଲେଖକ ସ୍ଵୀକାର କରିଥିଲେ |

ପ୍ରସଙ୍ଗଟି ପ୍ରଶଂସନୀୟ |

୪ . ନିମ୍ନଲିଖିତ ଶବ୍ଦଗୁଡିକୁ ବ୍ୟବହାର କରି ବାକ୍ୟ ଗଢ :

ବକ୍ତୃତା : - ଗୋପାଳର ବକ୍ତୃତା ଶୁଣି ଶ୍ରୋତାମାନେ ମୁଗ୍ଧ ହେଲେ |

ମହାତ୍ମା : - ଗୋପବନ୍ଧୁଙ୍କ ଭଳି ମହାତ୍ମା ଆଉ ଜନ୍ମିବେ ନାହିଁ |

ବୀଜ :- ମନ୍ଥରା କୈକେୟୀଙ୍କ ମନରେ କଳିର ବୀଜ ପୋତିଦେଲା |

ଅଧ୍ୟବସାୟ :- ଅଧ୍ୟବସାୟ କଲେ ଜୀବନର ସଫଳତା ମିଳେ |

ପରିପକ୍ୱ : - ବୟସ ବଢିଲେ ବୁଦ୍ଧି ପରିପକ୍ଵ ହୁଏ |

୫. ନିମ୍ନଲିଖିତ ପ୍ରଶନଗୁଡିକର ଉତ୍ତର ଲେଖ :

କ) ଅସହଯୋଗ ଆନ୍ଦୋଳନ ସମୟରେ ଲେଖକକିପରି ସ୍ଵାଧୀନତା ସଂଗ୍ରାମ ସହିତ ସଂଶ୍ଳିଷ୍ଟ ଥିଲେ ?

ଉତ୍ତର : ଅସହଯୋଗ ଆନ୍ଦୋଳନ ସମୟରେ ଲେଖକ ନିଜକୁ ଜଣେ ଦେଶସେବକ ଭାବେ ଉତ୍ସର୍ଗ କରିଥିଲେ | ସେ ମହାତ୍ମା ଗାନ୍ଧୀଙ୍କ ଡାକରାରେ ଅସହଯୋଗ ଆନ୍ଦୋଳନ ସହିତ ସାମିଲ ହେଲେ | ସ୍କୁଲରୁ ନାମକାଟି ରାଜନୀତିରେ ଯୋଗଦେଲା ଜନ୍ମଭୂମିର ଉନ୍ନତିପାଇଁ ଉତ୍କଳ ସମ୍ମିଳନୀର ନେତୃବର୍ଗଙ୍କ ସହିତ ଜଡ଼ିତ ହେଲେ | ମଧୁବାବୁ, ଉତ୍କଳମଣି ଏବଂ ଅନ୍ୟାନ୍ୟ ନେତୃବର୍ଗଙ୍କ ପ୍ରଭାବରେ ପ୍ରଭାବିତ ହୋଇ ସେମାନଙ୍କ ପଥକୁ ଅନୁସରଣ କଲେ |

ଖ) “ବ୍ରହ୍ମଚାରୀ ମୁଇଁ” ର ଭବିଷ୍ୟତ ଗଠନରେ ଲେଖକ କିପରି ସହାୟକ ହେଲେ ?

ଉତ୍ତର : ବ୍ରହ୍ମଚାରୀ ମୁଇଁ ଜଣେ ଗରିବ ବାଳକ ଥିଲା | ଦିନେ ଲେଖକ ଗୃହ ବାରଣ୍ଡାରେ କେତେଜଣ ଛାତ୍ର ସଙ୍ଗେ ବସିଥିବା ବେଳେ ସେ ସେଠାରେ ପହଞ୍ଚିଥିଲା | ସେହି ଗରିବ ବାଳକଟିର ଅବସ୍ଥା ବିଷୟରେ ବୁଝି ଲେଖକ ତା’ର ପାଠ ପଢିବାରେ ବ୍ୟବସ୍ଥା କରିଥିଲେ | ସାଙ୍ଗସାଥିଙ୍କ ସହାୟତାରେ ତାକୁ ବହି ଯୋଗାଇ ଦେଇ, ମଠର ମହନ୍ତଙ୍କୁ କହି ଖାଦ୍ୟପେୟର ବ୍ୟବସ୍ଥା କରି ଦରମା ପାଇଁ ସ୍କଲାରସିପ୍ ବ୍ୟବସ୍ଥାକୁ ଅବନୈତିକ ଶିକ୍ଷା ଲାଭର ବ୍ୟବସ୍ଥା କରି ଲେଖକ ତା’ର ଭବିଷ୍ୟତ ଗଠନରେ ସହାୟକ ହୋଇଥିଲେ |

ଗ) ପିଲାଟିର ଲେଖକଙ୍କ ପ୍ରତିଥିବା କୃତଜ୍ଞତା କିପରି ପ୍ରମାଣିତ ହେଲା ?

ଉତ୍ତର : ପିଲାଟି ନିହାତି ଗରିବ ଥିଲା | ଲେଖକ ତା’ର ଭବିଷ୍ୟତ ଗଢିବା ପାଇଁ ସମସ୍ତ ପ୍ରକାରର ସାହାଯ୍ୟ କରିଥିଲେ | ପିଲାଟି ଲେଖକଙ୍କ ସାହାଯ୍ୟ ପାଇଁ ପାଠ ପଢିଲା ଏବଂ ଭାଗ୍ୟବଳରୁ ସାମରିକ କର୍ମଚାରୀ ଭାବରେ ନିଯୁକ୍ତି ପାଇଲା | ଲେଖକ ଏକଦା ଖୋର୍ଦ୍ଧା ଷ୍ଟେସନ୍ ରେ ମାନ୍ଦ୍ରାଜ ମେଲ୍ କୁ ଅପେକ୍ଷା କରି ଠିଆ ହୋଇଥିବା ବେଳେ ସେଠାରେ ପହଞ୍ଚିଥିବା ସ୍ପେଶାଲ ମିଲିଟାରୀ ଗାଡ଼ିରୁ ସ୍ଵତନ୍ତ୍ର ବଗିରୁ ସାହେବ ରୂପରେ ଓହ୍ଲାଇ ଆସି ଅତୀତରେ ସେହି ପିଲାଟି ଲେଖକଙ୍କ ହାତଧରି ନମସ୍କାର ପକାଇ କୃତଜ୍ଞତା ଜଣାଇଥିଲେ ଏବଂ ନିଜର ପରିଚୟ ଦେଇ କହିଥିଲା “ ଆପଣଙ୍କ କରୁଣାରୁ ମୁଁ ଆଜି ଏହି ଲେଫ୍ଟନାଣ୍ଟ ପଦବୀରେ ନିଯୁକ୍ତ ହୋଇପାରିଛି |”

୬. “ପ୍ରଭାବ” ଶବ୍ଦର ବିଶେଷଣ ଯେପରି “ପ୍ରଭାବିତ” ସେହିଭଳି ନିମ୍ନ ବିଶେଷ୍ୟ ପଦଗୁଡିକର ବିଶେଷଣ କଅଣ ହେବ ଲେଖ |

ଉତ୍ତର : ବିଶେଷ୍ୟ ପଦ : - ଯେଉଁ ପଦ କୌଣସି ବ୍ୟକ୍ତି, ଜାତି ବସ୍ତୁ , ଗୁଣ ବା କ୍ରିୟାର ନାମକୁ ପ୍ରକାଶ କରେ ତାକୁ ବିଶେଷ୍ୟ ପଦ କହନ୍ତି |

ଉଦାହରଣ : -

ବ୍ୟକ୍ତି – ରାମ , ଶ୍ୟାମ , ସୀତା , ସାବିତ୍ରୀ ଇତ୍ୟାଦି

ଜାତି – ଗାଈ ଜାତି , ମଣିଷ ଜାତି , ଗଛ ଜାତି, ଛେଳି ଜାତି , ନଦୀ ଜାତି, ପର୍ବତ ଜାତି ଇତ୍ୟାଦି

ବସ୍ତୁ – ବାଲି , ମାଟି(ପାତ୍ର) , ପଥର(ମୂର୍ତ୍ତି), ସୁନା (ହାର) , ତମ୍ବା , ଚେନ , ମୁଦି

ଗୁଣ ବା ଅବସ୍ଥା – ସାଧୁତା, ନେତୃତ୍ୱ , ସୌନ୍ଦର୍ଯ୍ୟ , ଶୌଶବ , ମମତା , ସୁଖ, ଦୁଃଖ , ବନ୍ଧୁତା , ପରାକ୍ରମ (ଗୁଣ କୁ ଦେଖି ହୁଏନାହିଁ ଅନୁଭବ କରିହୁଏ)

କ୍ରିୟା : ପଢା , ଖିଆ , ପିଆ , ଭୋଜନ , ଶୟନ , ରନ୍ଧନ

ବିଶେଷଣ : - ଯେଉଁ ପଦ ବିଶେଷ୍ୟ ପଦର ଗୁଣ , ଅବସ୍ଥା , ସଂଖ୍ୟା ବା ପରମାଣ ଇତ୍ୟାଦିକୁ ପ୍ରକାଶ କରେ ତାହାକୁ ବିଶେଷଣ ପଦ କହନ୍ତି |

ଦିଆଯାଇଥିବା ଶବ୍ଦ ବିଶେଷଣ ରୂପ

ପରିଚୟ ପରିଚିତ

ନିର୍ବାଚନ ନିର୍ବାଚିତ

ଆମୋଦ ଆମୋଦିତ

ପୁଲକ ପୁଲକିତ

୭. ଲିଙ୍ଗ ପରିବର୍ତ୍ତନ କରି ଲେଖ |

ଉତ୍ତର :

ପିତାମହୀ ପିତାମହ

ଜନନୀ ଜନକ

ଛାତ୍ର ଛାତ୍ରୀ

ମହାରାଜା ମହାରାଣୀ

ପିତା ମାତା

ଭିକାରି ଭିକାରୁଣୀ

୮. ବନ୍ଧନୀ ମଧ୍ୟରୁ ଉପଯୁକ୍ତ ଶବ୍ଦ ବାଛି ଶୂନ୍ୟସ୍ଥାନ ପୂରଣ କର :

କ) ୧୯୨୧ ମସିହାରେ ମହାତ୍ମାଗାନ୍ଧୀ ପ୍ରଚାର ଉଦ୍ଦେଶ୍ୟରେ ପାରଳାଖେମୁଣ୍ଡି କୁ ଆସିଥିଲେ |

ଖ) କଠିନ ଅଧ୍ୟବସାୟ ବଳରେ ସେ ଅଳ୍ପକାଳ ମଧ୍ୟରେ ତୃତୀୟ ଶ୍ରେଣୀ ପାସ୍ କରିଥିଲା |

୯. ଏ କଥା କିଏ କାହାକୁ କହିଛନ୍ତି ?

କ) “ତୁମ ଜ୍ଞାନ ପାରିପକ୍ଵ ହେଲେ ଦେଶ ପାଇଁ କାମ କରିବାକୁ ଶକ୍ତି ପାଇବ |”

ଉତ୍ତର : ଏକଥା ଲେଖକଙ୍କୁ ତାଙ୍କ ନନା (ବାପା) କହିଛନ୍ତି |

ଖ) “ମୋର କେହି ନାହାନ୍ତି | ବୁଢୀ ମା’ ଥିଲେ , ମରିଗଲେ |”

ଉତ୍ତର : ଏକଥା ବ୍ରହ୍ମଚାରୀ ମୁଇଁ ଲେଖକଙ୍କୁ କହିଛି |

ଗ) “ଆପଣଙ୍କ କରୁଣାରୁ ମୁଁ ଆଜି ଏହି ଲେଫ୍ଟନାଣ୍ଟ ପଦବୀରେ ନିଯୁକ୍ତ ହୋଇପାରିଛି |”

ଉତ୍ତର : ଏକଥା ବ୍ରହ୍ମଚାରୀ ମୁଇଁ ଲେଖକଙ୍କୁ କହିଛି |

୧୦) ଉପଯୁକ୍ତ ବିରାମ ଚିହ୍ନ ଦେଇ ତଳଲିଖିତ ଗଦ୍ୟାଂଶଟିକୁ ଲେଖ |

ସେ ମୋ ଆଡେ ଚାହିଁ ସ୍ମିତହାସ୍ୟ କରି ହିନ୍ଦୀରେ କହିଲେ ଆରେ ପିଲା ତୁ ନିଜକୁ ନିଜେ ତ ସମ୍ଭାଳି ପାରୁନାହଁ ମୋତେ ସମ୍ଭାଳିବୁ କିପରି

ଉତ୍ତର : ସେ ମୋ ଆଡେ ଚାହିଁ ସ୍ମିତହାସ୍ୟ କରି ହିନ୍ଦୀରେ କହିଲେ, “ଆରେ ପିଲା ! ତୁ ନିଜକୁ ନିଜେ ତ ସମ୍ଭାଳି ପାରୁନାହୁଁ ,ମୋତେ ସମ୍ଭାଳିବୁ କିପରି ?

Mo Jibana Ra Abhula Katha Class 6 Odia Chapter 7 | ମୋ ଜୀବନର ଅଭୁଲା କଥା

RATINGS

Out of 1 ratings.

Other Chapters

Suggested